தொழிலதிபரிடம் ரூ.10 லட்சம் மோசடி: தலைமறைவான ‘அலைகள்’ சீரியல் நடிகை ராணி – போலீசார் தீவிர தேடுதல்!
Monish Dhanabalan 
சின்னத்திரை உலகில் வில்லியாக நடித்துப் பிரபலமான நடிகை ஒருவர், நிஜ வாழ்க்கையிலும் மோசடிப் புகாரில் சிக்கித் தலைமறைவாகியுள்ள சம்பவம் தமிழகத்தில் பெரும் பரபரப்பை ஏற்படுத்தியுள்ளது.
பின்னணி:
ஆந்திராவைப் பூர்வீகமாகக் கொண்ட நடிகை ராணி, தமிழில் அலைகள், சொந்தம், அத்திப்பூக்கள், வள்ளி போன்ற பல சூப்பர் ஹிட் சீரியல்களில் வில்லி வேடங்களில் நடித்து மக்கள் மத்தியில் பிரபலமானவர். திரையில் மிரட்டும் வில்லியாகத் தெரிந்த இவர், தற்போது கரூரைச் சேர்ந்த தொழிலதிபர் ஒருவரிடம் மோசடி செய்துள்ளதாகக் குற்றச்சாட்டு எழுந்துள்ளது.
புகாரும் மோசடியும்:
கரூர் பகுதியைச் சேர்ந்த ஒரு ஹோட்டல் அதிபரிடம் நடிகை ராணி நட்பு ரீதியாகப் பழகி வந்துள்ளார். அப்போது தனது தேவைக்காக அவரிடம் இருந்து:
- ரூ. 10 லட்சம் ரொக்கம்,
- விலை உயர்ந்த ஒரு BMW கார்,
- மற்றும் சில தங்க நகைகளை வாங்கியதாகக் கூறப்படுகிறது. பல மாதங்கள் கடந்தும், வாங்கிய பணம் மற்றும் காரைத் திருப்பித் தராமல் இழுத்தடித்த ராணி, ஒருகட்டத்தில் அந்தத் தொழிலதிபருக்குக் கொலை மிரட்டல் விடுத்ததாகவும் சொல்லப்படுகிறது.
போலீஸ் நடவடிக்கை:
பாதிக்கப்பட்ட தொழிலதிபர் இதுகுறித்து கரூர் காவல் நிலையத்தில் புகார் அளித்தார். புகாரைப் பெற்றுக்கொண்ட போலீசார், நடிகை ராணி மற்றும் அவரது கணவர் உட்பட மூன்று பேர் மீது பண மோசடி, கொலை மிரட்டல் உள்ளிட்ட பிரிவுகளின் கீழ் வழக்குப் பதிவு செய்துள்ளனர்.
தற்போது நடிகை ராணி தனது இருப்பிடத்தை மாற்றிக்கொண்டு தலைமறைவாக உள்ளதால், அவரைப் பிடிக்க போலீசார் தனிப்படை அமைத்துத் தீவிரமாக வலைவீசித் தேடி வருகின்றனர்.
பரபரப்பில் சின்னத்திரை:
வெள்ளித்திரையில் குழந்தை நட்சத்திரமாக அறிமுகமாகி, சின்னத்திரையில் ஒரு ரவுண்டு வந்த மூத்த நடிகை ஒருவர் இது போன்ற மோசடிப் புகாரில் சிக்கியுள்ளது சீரியல் வட்டாரத்தில் பெரும் அதிர்ச்சியை ஏற்படுத்தியுள்ளது.
About the Author
